VIDEO: Lopët lejohen të bredhin nëpër ndërtesat qeveritare në Indi në shenjë proteste
Organizatat bamirëse që drejtojnë strehimoret e bagëtive në shtetin perëndimor indian të Gujarat kanë liruar mijëra lopë për të protestuar kundër mungesës së ndihmës së premtuar nga qeveria, raporton BBC.
Videot e lopëve që enden nëpër ndërtesat qeveritare janë bërë virale.
Protestuesit kanë kërcënuar se do të bojkotojnë zgjedhjet e ardhshme shtetërore nëse qeveria nuk jep fondet.
Gujarat është ndër disa shtete indiane që po shërohen nga një shpërthim i një sëmundjeje të rrallë të lëkurës që ka çuar në humbje të mëdha të bagëtive.
Shteti ka raportuar më shumë se 5.800 ngordhje bagëtish, ndërsa rreth 170.000 vlerësohet të jenë prekur nga sëmundja.
Lopët janë kafshë të shenjta për shumicën e komunitetit hindu të Indisë dhe therja e tyre është e paligjshme në 18 shtete, përfshirë Gujarat.
Në vitin 2017, Gujarat forcoi ligjet e tij për mbrojtjen e lopëve duke njoftuar se ata që therin lopët mund të dënohen me burgim të përjetshëm.
Në buxhetin e saj për këtë vit, qeveria e Gujarat ndau 5 miliardë rupi (61 milion dollarë; 57 milion £) për të mirëmbajtur strehimore për lopët dhe kafshët e tjera të vjetra në shtet.