VIDEO: Italia e prekur nga një thatësirë e madhe, lumi më i gjatë Po pothuajse është tharë
Temperaturat e larta kanë shkaktuar thatësirë në të gjithë Italinë, lumenjtë dhe rezervuarët mbeten pa ujë, duke kërcënuar mjedisin dhe ekonominë, raportojnë mediat italiane.
Disa rajone italiane kanë shpallur tashmë një gjendje të jashtëzakonshme për të siguruar para për të luftuar krizën e ujit dhe shoqatat e fermerëve po parashikojnë një rënie të mprehtë të prodhimit në pjesë kyçe të vendit.
Lumi më i gjatë i Italisë, Po, po thahet.
Nivelet e ujit janë aq të ulëta sa edhe një anije e mbytur nga Lufta e Dytë Botërore është rishfaqur. pic.twitter.com/SEVUpxqQvH
- DW News (@dwnews) Korrik 3, 2022
"Kombinimi i thatësirës më të keqe në vitet e fundit dhe temperaturat...të cilat arritën 40 gradë Celsius në fund të qershorit po e çojnë Italinë në një situatë dramatike mjedisore dhe ekonomike," raportoi agjencia ANBI.
Po, lumi më i gjatë i Italisë, i cili përshkon rajone të mëdha në veri dhe ofron kushte për rreth një të tretën e prodhimit bujqësor të Italisë, regjistroi nivelin më të ulët të ujit në 70 vjet.
“Niveli i ujit në të gjithë Po-në është ende më i ulëti që nga monitorimi i të dhënave. Në dy javë sasia e ujit është përgjysmuar dhe ka rënë në pak më shumë se 170 metër kub në sekondë”, thekson ANBI.
Në liqenet e mëdhenj të veriut të Italisë, uji tashmë ka rënë nën nivelin e ulët rekord ose është afër tij dhe po bie fuqishëm edhe në rezervuarët natyrorë në Italinë qendrore. Niveli i ujit në Tiber është në nivelin më të ulët në vitet e fundit, dhe në Anien rrjedha është në gjysmë.