Një grup studiuesish nga Universiteti Durham në Britaninë e Madhe zbuluan se foshnjat në barkun e nënës kanë reagime të ndryshme ndaj shijeve dhe aromave të ndryshme. Duke përdorur ultratinguj, ata vëzhguan 97 foshnja të palindura, të cilat ishin midis 32 dhe 36 javëve të shtatzënisë së nënave të tyre dhe monitoruan reagimin e tyre pasi nënat konsumuan ushqime të caktuara, raportoi "This Now".

Studimi, i cili u botua së fundmi në Psychological Science, zbuloi se shumë nga foshnjat në barkun e nënës kishin një fytyrë të buzëqeshur pasi nënat e tyre hëngrën një karotë. Nga ana tjetër, shumica prej tyre kishin vrenjtur vetullat pasi nënat e tyre kishin ngrënë lakër jeshile.

“Gjetjet e këtij studimi kanë implikime të rëndësishme për të kuptuar provat më të hershme të aftësisë së fetusit për të ndjerë dhe dalluar shijet e ndryshme”, shkruan studiuesit në punim.

“Ne jemi të parët që mund të tregojmë shprehjet e fytyrës së foshnjës në lidhje me ushqimin që nëna sapo ka konsumuar”, tha Nadia Raisland, bashkëautore e studimit.

Gjithashtu, studiuesit zbuluan se shprehjet e fytyrës së foshnjës në lidhje me shijet bëhen më komplekse me rritjen e moshës së fetusit. Sipas tyre, preferenca për shije të caktuara mund të krijohen edhe kur fëmija është në barkun e nënës, si pasojë e ekspozimit të përsëritur. Me fjalë të tjera, ndoshta ushqimi juaj i preferuar është diçka që nëna juaj pëlqente të hante kur ishte shtatzënë me ju.