Një grua ka humbur jetën dhe dhjetë persona janë në kërkim pas rrëshqitjes së dheut të shkaktuar nga shirat e dendur ishulli jugor italian i Ischia, tha një përfaqësues lokal.

Shirat e dendur dhe të rrëmbyeshëm goditën portin e Casamichiola Terme, një nga gjashtë qytetet e vogla në ishull, herët të shtunën, duke shkaktuar përmbytje dhe shembje të ndërtesave.

“Është konfirmuar vdekja e një personi, një gruaje. “Tetë persona të zhdukur janë gjetur, mes tyre një fëmijë dhe ende nuk dihet fati i dhjetë personave”, tha prefekti i Napolit, Claudio Palomba në një konferencë për shtyp.

Më herët, Zëvendëskryeministri dhe Ministri i Infrastrukturës Matteo Salvini, gjithashtu lider i partisë kundër emigrantëve Lidhja, u tha gazetarëve në Milano se tetë persona ishin konfirmuar të vdekur nga rrëshqitjet e dheut të shkaktuara nga shirat e dendur, një pretendim që më vonë u mohua nga ministri i Brendshëm Matteo Piantedosi.

Alluvione a Casamicciola, Ischia pic.twitter.com/WfImPooe5g

— Kurosh1974 (@Kurosh_74) Nëntor 26, 2022

Shtatëdhjetë zjarrfikës po punojnë në ishull, 30 kilometra larg Napolit, për të tërhequr banorët nga ndërtesat e dëmtuara dhe për të gjetur njerëz të zhdukur, njoftoi brigada e zjarrfikësve në Twitter.

Pamjet tregojnë baltën e trashë, mbeturinat dhe gurët në Casamichiola Terme. Disa makina u zhytën përgjatë bregdetit dhe me sa duket u hodhën në det nga stuhia.

Casamichiola Terme, një qytet turistik me 8.000 banorë në dimër, pësoi një tërmet në 2017 që vrau dy njerëz dhe në 1883 qyteti u rrafshua nga një tërmet shumë i fortë.

Ischia është një ishull vullkanik që tërheq vizitorë çdo vit me ujërat e tij termale dhe peizazhin e bukur. Është mjaft e populluar dhe statistikat tregojnë se shumë shtëpi janë ndërtuar pa leje ndërtimi, për shkak të të cilave banorët rrezikohen nga vërshimet, dhe ka tërmete të shpeshta.

Në vitin 2006, një rrëshqitje dheu vrau një baba dhe tre vajzat e tij.

Jugu i Italisë, ku shtëpitë shpesh ndërtohen ilegalisht për të anashkaluar rregullat e sigurisë, është i prirur për rrëshqitje fatale të dheut.

Në vitin 1998, të paktën 150 njerëz vdiqën kur një rrëshqitje dheu përmbyti fshatin Sarno, jo shumë larg Napolit.