Një djalë 14-vjeçar në Brazil ka vdekur tragjikisht pasi i injektoi vetes lëngun e marrë nga një flutur e ngordhur.

Autoritetet në vend madje po hetojnë nëse ajo që bëri Davi Nunez Moreira ishte rezultat i një sfide në internet.

I mituri filloi të vjella dhe më pas u rrëzua pasi i injektoi lëngun e çuditshëm në këmbë.

Fillimisht djali i tha të atit se kishte goditur veten duke luajtur, por kur simptomat filluan të përkeqësoheshin, ai tregoi se çfarë kishte bërë. Babai i tij, i cili gjeti shiringën që i biri kishte përdorur poshtë shtratit, e çoi në një spital në zonën e Planaltos.

Megjithatë, gjendja shëndetësore e fëmijës ishte aq e keqe sa u pa e nevojshme transferimi i tij në një spital tjetër më të madh, ku megjithatë mjekët nuk arritën ta mbanin në jetë.

Vdekja e tij ka të ngjarë t'i atribuohet toksinave të pranishme në lëngun nga flutura e ngordhur, gjë që e bëri atë të përjetonte tronditje septike.

Një ekspert i fluturave dhe drejtor i Muzeut të Zoologjisë në Universitetin e São Paulo shpjegoi se efekti i toksicitetit të fluturave në trupin e njeriut nuk është studiuar mjaftueshëm. Siç tha ai në mënyrë karakteristike, “fluturat kanë një sistem kompleks biologjik dhe lëngjet në trupin e tyre nuk janë studiuar në mënyrë adekuate, veçanërisht për sa i përket toksicitetit që mund të kenë për trupin e njeriut”.