Në parlamentin e Serbisë sot po mbahet një seancë e posaçme për Kosovën, ku do të diskutohet për procesin e negociatave me Prishtinën. Presidenti Aleksandar Vuçiq, i cili do të marrë pjesë në seancë, ka paralajmëruar se do t'ua prezantojë deputetëve planin franko-gjerman, por nuk ua ka dorëzuar atë dokument.

Sipas njoftimit të presidentit të Serbisë, Aleksandar Vuçiq, diskutimi mund të zgjasë tre ditë. Është e sigurt se në rend dite do të jetë edhe raporti për procesin e negociatave me institucionet e përkohshme në Prishtinë, duke filluar nga 1 shtatori deri më 15 janar.

Është një dokument i mbështetur nga Qeveria e Serbisë, përkatësisht nga Zyra për Kosovë dhe Metohi, i cili i referohet dialogut teknik dhe që detajon dhunën ndaj serbëve në muajt e fundit.

Ajo që pritej të ishte temë kryesore e debatit në parlament ishte propozimi franko-gjerman apo evropian për Kosovën, por deputetët nuk do ta shohin. Megjithatë, Vuçiq ka bërë të ditur se do të flasë për të.

Ai ka deklaruar se është i gatshëm të qëndrojë në Kuvend për dy deri në tre ditë, “për aq kohë sa të zgjasë diskutimi”.

“Presidentët e tjerë kur erdhën recituan fjalimet e tyre dhe u larguan nga parlamenti. Unë jam i vetmi që marr pjesë në debat për të katërtën herë. Jam gati të rri dy-tre ditë, sa të zgjasë diskutimi në parlament, të mos dal. “Kam bërë gjithçka me ndershmëri dhe do të luftoj për vendin tim për aq kohë sa të mundem dhe për aq kohë sa të jem president në përputhje me mandatin tim kushtetues, duke mos e tejkaluar atë për asnjë moment”, tha Vuçiq.

Vuçiq më herët tha se nëse Serbia nuk e pranon planin franko-gjerman për Kosovën, i cili parasheh anëtarësimin e Kosovës në disa organizata ndërkombëtare, negociatat me BE-në do të ndërpriten dhe Brukseli do të tërheqë investimet dhe madje do të rivendosë regjimin e vizave për qytetarët serbë.

Deri më tani janë publikuar disa versione jozyrtare të atij plani dhe më së shumti vëmendje e ka tërhequr pikën në të cilën mbulohet anëtarësimi i Kosovës në OKB, përkatësisht ai përfshin anëtarësimin në të gjitha organizatat ndërkombëtare ku mendon se duhet të integrohet. Sipas non-paper, të publikuar nga gazeta “Albania Post”, përmenden disa organizata ndërkombëtare, konkretisht Këshilli i Europës, Bashkimi Europian dhe NATO.

Opozita mendon se seanca është e kotë nëse deputetët nuk arrijnë ta shohin propozimin franko-gjerman.

Një pjesë e opozitës i ka dorëzuar Kuvendit të Serbisë një propozim për rezolutën për Kosovën, e cila parasheh refuzimin e “planit gjermano-francez”, sepse kërcënon integritetin territorial dhe sovranitetin e Serbisë.

Në Rezolutën për parimet themelore për veprim të mëtejmë politik për mbrojtjen e interesave shtetërore dhe kombëtare të Kosovës dhe Metohisë, thuhet se “Serbia në pajtim me Kushtetutën e saj, vullnetin e qytetarëve dhe të drejtën ndërkombëtare, nuk njeh dhe do të asnjëherë, shprehimisht apo në heshtje në asnjë mënyrë, pavarësinë e shpallur në mënyrë të njëanshme të Krahinës Autonome të Kosovës dhe Metohisë”.