Kievi zyrtar nuk është ftuar në bisedimet në Arabinë Saudite mes Shteteve të Bashkuara dhe Rusisë që synojnë t'i japin fund luftës në Ukrainë.

I dërguari i posaçëm i SHBA për Ukrainën, Keith Kellogg tha se "Kiev do të përfshihet në bisedimet të hënën në Arabinë Saudite", por një burim i BBC pretendon se një delegacion nga Ukraina nuk do të marrë pjesë.

Udhëheqësit evropianë gjithashtu nuk janë ftuar për t'u bashkuar me bisedimet dhe përkundrazi do të takohen sot në Paris në një samit të organizuar me ngut nga presidenti francez Emmanuel Macron, pasi frika rritet se Evropa po lihet jashtë negociatave.

Takimet e veçanta vijnë pas një jave të trazuar në të cilën Uashingtoni sinjalizoi një ndryshim drastik në qasjen ndaj luftës në Ukrainë.

I dërguari i Shtëpisë së Bardhë për Lindjen e Mesme Steve Witkoff konfirmoi se ai po udhëton në Arabinë Saudite të dielën në mbrëmje për bisedimet e para ballë për ballë midis Shteteve të Bashkuara dhe Rusisë për t'i dhënë fund konfliktit. Presidenti i SHBA Donald Trump zbuloi të dielën se Witkoff u takua me Putinin dhe takimi zgjati afërsisht tre orë.

Witkoff, një miliarder dhe mik i Trump, ishte në Moskë këtë javë për të siguruar lirimin e një mësuesi amerikan të arrestuar në Rusi për akuzat për posedim marijuanë.

Sekretari amerikan i Shtetit Marco Rubio dhe Këshilltari i Sigurisë Kombëtare Mike Walz janë planifikuar gjithashtu të takohen me negociatorët rusë në Arabinë Saudite.

Zelensky ka refuzuar publikisht disa herë pranimin e një marrëveshjeje paqeje pa Ukrainën, duke i thënë rrjetit televiziv amerikan NBC se ai "nuk do të pranojë kurrë asnjë vendim midis Shteteve të Bashkuara dhe Rusisë pa pyetur Ukrainën".

Nga ana tjetër, mesazhe kontradiktore vijnë nga Shtetet e Bashkuara.

I dërguari i posaçëm i Trump, Steve Witkoff, tha më parë se zyrtarët amerikanë kishin folur veçmas me zyrtarët ukrainas dhe se Ukraina ishte "pjesë e negociatave" - ​​por nuk tha nëse ai priste që Kievi të ishte i pranishëm në Arabinë Saudite.

Vetë Trump tha dje në një deklaratë jozyrtare se pret që Zelensky të përfshihet në negociata, por nuk tha se si. Ai tha gjithashtu se do të lejojë vendet evropiane të blejnë armë amerikane për Ukrainën.

Nga ana tjetër, shefi i Departamentit të Shtetit të SHBA-së, Marco Rubio, minimizoi rëndësinë e bisedimeve në Arabinë Saudite, duke thënë se një takim i vetëm nuk do të zgjidhte luftën dhe se një proces zyrtar negociues – i cili do të ndërmjetësonte midis Ukrainës, Rusisë dhe palëve të treta – nuk ishte krijuar ende.

Ai, megjithatë, i tha CBS News se ditët e ardhshme do të përcaktojnë nëse Putini është serioz për arritjen e paqes.

Takimet shënojnë një përshpejtim të përpjekjeve të Trump për të arritur një fund të shpejtë të luftës.

Shtëpia e Bardhë tha se presidenti amerikan pati një telefonatë "të gjatë" me presidentin rus Vladimir Putin të mërkurën, pas së cilës Trump tha se negociatat për t'i dhënë fund "luftës qesharake" në Ukrainë do të fillonin menjëherë.

Ai tha gjithashtu se nuk ishte "praktike" që Ukraina të anëtarësohej në NATO dhe se ishte "e pamundur" që ajo të mund të kthehej në kufij përpara pushtimit të vitit 2014.

Zelensky bëri thirrje të shtunën për krijimin e një ushtrie evropiane, duke argumentuar se kontinenti evropian nuk mund të llogarisë më në Uashington.

Analiza e plotë në videon e mësipërme në tekst.