Ministri i Jashtëm serb Ivica Daçiç la të kuptohet për herë të parë se Beogradi mund të ndryshojë kursin dhe të vendosë sanksione kundër Rusisë, që është një nga kërkesat kryesore të BE-së për Serbinë për të avancuar në negociatat e anëtarësimit.

Në një intervistë ekskluzive për “EUraktiv Srbija”, Daçiq ka thënë se Serbia, kandidate për në BE që nga viti 2012, është udhëhequr në radhë të parë nga vlerësimi që është në interesin e saj.

Në deklaratë ai ka përsëritur se Beogradi e dënon shkeljen e integritetit territorial të Ukrainës dhe për këtë Serbia e ka votuar në organet ndërkombëtare.

“Nëse do të vendosim sanksione kundër Rusisë është një pyetje tjetër. Nuk është çështje kohe apo afatesh, është çështje e interesave tona politike dhe ekonomike”, tha ai për “EURaktiv Serbia”.

Vendosja e sanksioneve kundër Rusisë është një nga kërkesat kryesore në draft tekstin franko-gjerman të publikuar së fundmi, sipas të cilit Serbia dhe Kosova duhet të përmbushin disa zgjidhje kompromisi për të zgjatur dialogun dhe për të zgjidhur çështjen e gjatë dekadash të Kosovës.

Përveç obligimit të Beogradit që të ndalojë bllokimin e përpjekjeve të Kosovës për anëtarësim në institucionet ndërkombëtare, Serbisë iu kërkua edhe vendosja e sanksioneve kundër Rusisë.

Serioziteti i ultimatumit të fundit shkoi deri aty sa që dje i dërguari special i BE-së për rajonin, Miroslav Lajçak, sqaroi se edhe Kosova edhe Serbia janë të detyruara të pranojnë pikat e propozimit të ri evropian. Nëse njëra palë nuk e pranon, do të përballet me pezullimin e integrimit europian dhe automatikisht e gjithë mbështetja do të shkojë tek pala tjetër që do të pranojë marrëveshjen.

Vetë presidenti serb Vuçiq, në shpjegimin e ultimatumit të ri evropian, ka kujtuar se Serbia po përballet me një periudhë të vështirë. Por ai nuk mungoi të theksojë se Serbia ka shkëmbimin më të madh tregtar me vendet e BE-së dhe se investimet me të cilat krenohet janë pikërisht nga marrëdhëniet me BE-në. Prandaj paralajmërimi se nëse nuk zbaton dispozitat e fundit të ultimatumit evropian, do të përballet me sanksione dhe paqëndrueshmëri të re ekonomike e më pas sociale.

I udhëhequr nga kjo dhe deklarata e mbrëmshme e Lajçakut, Beogradi me shumë gjasa do të duhet të dorëzohet dhe më në fund, si vendi i fundit në rajon që nuk ka vendosur, të vendosë sanksione ndaj Rusisë. Mbetet për t'u parë se çfarë reagimi do të ketë Moska, por mbi të gjitha numri i madh i simpatizantëve prorusë në Serbi, të cilët, ndryshe nga kursi drejt BE-së, duan marrëdhënie më të ngushta me Moskën.

Pas prezantimit përfundimtar, një pjesë e mediave politike dhe shoqërisë civile tashmë e kanë akuzuar atë për “shitje të interesave serbe në Kosovë dhe dëmtim të marrëdhënieve me vëllezërit e tij rusë” në kurriz të marrëdhënieve më të ngushta me Brukselin dhe BE-në.

Presidenti serb Aleksandar Vuçiq ka qenë ashpër kundër sanksionimit të Moskës për ofensivën e saj në Ukrainë, duke theksuar shpesh se Serbia importon të gjithë naftën dhe gazin e saj nga Rusia, por është nën presion në rritje nga Perëndimi për të ndryshuar qëndrimin e saj. Në tetor, ai zbuloi një plan prej 12 miliardë eurosh për investime në infrastrukturën e energjisë gjatë gjashtë viteve për të diversifikuar dhe siguruar furnizimet me energji.

Por mesa duket diçka ka ndryshuar me propozimin e fundit franko-gjerman për Kosovën, të cilin Beogradi e quajti ultimatum evropian.