Departamenti Amerikan i Shtetit vendosi sanksione ndaj ish-zëvendëskryeministrit të Qeverisë së Maqedonisë, Artan Grubi dhe gjyqtarit të Gjykatës së Apelit, Enver Bejeti, për shkak të përfshirjes së tyre në korrupsion.

Sipas deklaratës, Grubi dhe Bejeti kanë pranuar ryshfet për të minuar procedurën gjyqësore lidhur me dënimin penal të Sasho Mijalkovit, ish-drejtor i Administratës së Sigurisë dhe Kundërzbulimit (UBK).

– Në rastin e Artan Grubit, përshtatet shumë maksima e thënë nga ish-sekretari amerikan i Shtetit, Henry Kissinger, i cili tha: Nuk e di çfarë është më keq, të jesh mik apo armik i Amerikës. Grubi ishte objektivisht politikani më miqësor në Maqedoni ndaj politikës amerikane dhe tani ai përfundoi në listën e zezë të tyre. Duhet theksuar se ky veprim i Departamentit të Shtetit nuk ka asnjë rëndësi juridike në sistemin tonë të drejtësisë, por kjo nuk do të thotë se nuk duhet të bëhet një hetim. Nga inspektimi i Këshillit Gjyqësor është konstatuar se gjyqtari nga Gjykata e Apelit, Enver Bejeti, qëllimisht e ka mbajtur në sirtar lëndën “shënjestër-kala”, në të cilin i akuzuari i parë ishte Sasho Mijalkov. Bejetti u gjobit me 20 për qind të pagës për një periudhë gjashtëmujore, që është një sanksion qesharak. Amerikanët tani po aludojnë se Grubi qëndronte pas kësaj dhe për këtë po vendosin sanksione ndaj tij dhe anëtarëve të familjes së tij të ngushtë. Është e sigurt se në të ardhmen Grubi nuk do të ketë vend në menaxhmentin e BDI-së, por mendoj se duhet të hetohen akuzat për të përcaktuar nëse ai është fajtor apo jo - thotë gazetari i Sloboden Pechat, Srdjan Ivanoviq.