Washington Post zbulon: FBI kërkoi dokumente mbi armët bërthamore nga Trump

Ish-presidenti amerikan Donald Trump / Foto nga EPA-EFE / JUSTIN LANE

Agjentët e FBI-së po kërkonin dokumente në lidhje me temën – armët bërthamore, gjatë bastisjes në shtëpinë e ish-presidentit amerikan Donald Trump në Florida, raportoi Washington Post. Nuk dihet nëse dokumente të tilla janë gjetur në Palm Beach, ku ndodhet shtëpia e Donald Trump, shkruan Washington Post.

Departamenti i Drejtësisë i ka kërkuar një gjyqtari hetues që të lëshojë një urdhër që autorizon kontrollin e shtëpisë së pushimit të Trump, në mënyrë që publiku të mësojë më shumë se çfarë saktësisht po kërkojnë hetuesit në kontrollin e paprecedentë të shtëpisë së ish-presidentit. Trump i quajti ngjarjet në Florida këtë javë një hakmarrje politike.

Ardhja e hetuesve në Florida është pjesë e një hetimi nëse Trump hoqi në mënyrë të paligjshme dokumente nga Shtëpia e Bardhë kur u largua nga detyra në janar 2021.

Prokurori i shtetit Merrick Garland tha se ai personalisht miratoi vendimin për të urdhëruar kontrollin.

“Ministria nuk i merr kollaj vendime të tilla. Kurdoherë që është e mundur, praktika është përdorimi i mjeteve më pak ndërhyrëse të hetimit dhe ngushtimi i fushës së tij”, tha Garland.

Konfirmimi i tij është i pazakontë, duke pasur parasysh se Departamenti Amerikan i Drejtësisë nuk diskuton normalisht hetimet në vazhdim. Por në këtë rast, Trump njoftoi të hënën mbrëma se shtëpia e tij po kontrollohej.

Garland tha se Departamenti i Drejtësisë i ka kërkuar gjykatës të lëshojë urdhrin e vulosur të kërkimit, i cili mund të hedhë dritë mbi natyrën e hetimit.

Një burim i njohur me hetimin tha se agjentët e FBI-së sekuestruan dhjetë kuti nga shtëpia e Trump gjatë kontrollit.

Video e ditës