UNICEF paralajmëron: Ndihma nevojitet urgjentisht për 11 milionë fëmijë në Jemen
Fondi i Kombeve të Bashkuara për Fëmijët (UNICEF) njoftoi se 11 milionë fëmijë në Jemen kanë nevojë për ndihmë humanitare dhe se nevojiten urgjentisht 484 milionë dollarë për të vazhduar ndihmat për atë vend, raporton Anadolli.
“Tetë vite të vështira të konfliktit në Jemen kanë shkatërruar jetën e miliona fëmijëve. Rreth 11 milionë fëmijë në vend kanë nevojë për ndihmë humanitare. Nëse nuk merren masa urgjente, miliona janë në rrezik të kequshqyerjes”, tha UNICEF në një deklaratë.
Shtohet se situata e fëmijëve refugjatë është jashtëzakonisht shqetësuese.
Në deklaratë thuhet se ka më shumë se 2,3 milionë fëmijë, nevojat bazë të të cilëve nuk mund të plotësohen në kampet e refugjatëve.
Jemeni ka qenë një vatër konflikti dhe dhune që nga viti 2014, kur lëvizja rebele Houthi mori nën kontroll pjesën më të madhe të vendit, duke përfshirë kryeqytetin Sanaa. Konflikti u përshkallëzua një vit më vonë kur Arabia Saudite dhe aleatët e saj arabë u rreshtuan në anën e qeverisë jemenase dhe filluan të nisin sulmet ajrore ndaj pozicioneve rebele.
Jemeni është një nga vendet më të varfra dhe lufta në atë vend ka çuar në një krizë të tmerrshme dhe një nga krizat më të thella humanitare në botë.