Komandanti i një prej njësive ukrainase, koloneli Yevgeny Mezhevikin, vlerësoi se beteja për Bakhmut mund të bëhet një pikë kthese në luftë dhe se Ukraina është në gjendje të mbajë qytetin dhe të shtypë trupat ruse.

Mezhevikin beson se nëse ukrainasit arrijnë të ruajnë sukseset e tyre të fundit, Beteja e Bakhmut mund të jetë një pikë kthese në mbrojtjen e Ukrainës kundër Rusisë, jo vetëm për shkak të ndalimit të ofensivës ruse, por edhe për shkak të përgatitjes së një kundërsulmi të fortë. shkruan “Ukrainska Pravda”.

Sipas Mezhevikin, sulmet ruse në Bakhmut janë ngadalësuar dhe kërcënimi i menjëhershëm i një rrethimi është shmangur. Ai shtoi se forcat ruse kanë “shteruar të gjitha rezervat e tyre”.

Mezhevikin tha se në anët veriore dhe jugore të Bakhmut, ku trupat ruse u përpoqën të rrethonin qytetin, rusët u ndeshën me njësitë më të motivuara ukrainase dhe se ata "nuk kishin më forcë".

Megjithatë, shtoi Mezhevikin, qendra e qytetit mbetet një vatër, ku forcat ruse po sulmojnë me forcë të konsiderueshme.

Ushtarët ukrainas që luftojnë në Bakhmut thanë se trupat ruse po fokusonin përpjekjet e tyre në depërtimin në qendër të qytetit, duke përdorur artileri të rëndë dhe sulme ajrore, raportoi Ukrainska Pravda.