Ushtria ukrainase u tërhoq nga Lisichansk

Sulm i ri rus në Lisichansk, Ukrainë / Foto: EPA-EFE / SERGEY DOLZHENKO

Ushtria ukrainase njoftoi sot se është tërhequr nga Lisichansk, një qytet strategjik në pjesën lindore të vendit, i cili prej javësh është nën sulme të ashpra nga forcat e armatosura ruse dhe separatistët.

"Për të ruajtur jetën e mbrojtësve ukrainas (të Lisichansk), u mor një vendim për t'u tërhequr nga qyteti", thuhet në njoftimin e Shtabit të Përgjithshëm të Forcave të Armatosura të Ukrainës.

Në deklaratë shtohet se “në kushtet e epërsisë së shumëfishtë të ushtarëve rusë në artileri, aviacion, raketahedhës, municione dhe personel, vazhdimi i mbrojtjes së qytetit do të kishte pasoja fatale”.

Rusia njoftoi këtë mëngjes se kishte vendosur kontrollin mbi Lisichansk.

Marrja e qytetit do të thotë se ushtria ruse dhe separatistët tani kanë kontroll të plotë mbi rajonin e Luhanskut.

Video e ditës