Ushtria ukrainase pretendon se ka vrarë komandantin e flotës ruse të Detit të Zi në një sulm ndaj selisë së saj që ndodhi të premten në Sevastopol, në Krimenë e aneksuar.

“Tridhjetë e katër oficerë, përfshirë komandantin e Flotës ruse të Detit të Zi, vdiqën pas sulmit”, thanë forcat speciale ukrainase në Telegram, pa përmendur asnjë provë.

“Njëqind e pesë persona të tjerë u plagosën. Ndërtesa e selisë nuk është riparuar”, ka konfirmuar i njëjti burim.

Agjencia AFP thekson se nuk mund t'i konfirmojë këto pretendime, ndërsa Moska pothuajse kurrë nuk raporton humbje në Ukrainë, edhe kur bëhet fjalë për zyrtarë të lartë.

Rusia raportoi të premten se vetëm një ushtar ishte zhdukur pasi një sulm dëmtoi rëndë selinë e flotës ruse të Detit të Zi.

Sulmi ilustron vështirësinë e mbrojtjes ajrore ruse për t'iu kundërvënë sulmeve të rregullta në gadishullin ukrainas, i cili u aneksua nga Rusia në vitin 2014 dhe është një qendër e rëndësishme logjistike për forcat e Moskës.

Ukraina ka premtuar të kthejë të gjitha territoret e pushtuara nga Moska, përfshirë Krimenë.