Negociatat midis Kievit dhe aleatëve të tij mbi kërkesat e Ukrainës për raketa me rreze të gjatë veprimi, për të cilat ajo thotë se synojnë të pengojnë Moskën të shkatërrojë qytetet ukrainase, po vazhdojnë me shpejtësi, tha një këshilltar i presidentit Volodymyr Zelensky, Mykhailo Podolyak.

“Për të reduktuar në mënyrë drastike armët kryesore të Rusisë, ne kemi nevojë për raketa që do të shkatërrojnë rezervat e tyre”, tha Podolyak për televizionin ukrainas.

Ai shtoi se ka më shumë se 100 depo artilerie në Krime, e cila ishte e pushtuar nga Rusia.

“Para së gjithash, kjo është arsyeja pse negociatat tashmë janë duke u zhvilluar. Së dyti, negociatat po ecin me ritme të përshpejtuara”, shtoi ai, por nuk u fut në detaje.

Duke folur veçmas, Zelensky tha se Ukraina dëshironte të parandalonte sulmet ruse në zonat urbane të Ukrainës dhe civilët.

"Ukraina ka nevojë për raketa me rreze të gjatë për t'i privuar okupatorit aftësinë për të vendosur raketat e saj diku larg vijës së frontit dhe të shkatërrojë qytetet e Ukrainës," tha ai në mesazhin e tij video të mbrëmjes. Zelensky shtoi se Ukraina ka nevojë për raketa ATAKMS të prodhimit amerikan, të cilat kanë një rreze veprimi prej 297 kilometrash. Uashingtoni deri më tani ka refuzuar të dërgojë ato armë.

Ukraina, së cilës i janë premtuar tanke perëndimore, ka kërkuar gjithashtu avionë luftarakë për të zmbrapsur forcat ruse dhe pro-ruse, të cilat po përparojnë ngadalë në disa pjesë të vijës së frontit.

Zëvendës-këshilltari i Sigurisë Kombëtare i Shtëpisë së Bardhë, John Finner, tha të enjten se Shtetet e Bashkuara do të diskutojnë idenë e dërgimit të avionëve "me kujdes" me Kievin dhe aleatët e tij. Ministri i Mbrojtjes i Gjermanisë përjashtoi mundësinë e dërgimit të avionëve luftarakë në Ukrainë këtë javë.