Në një sulm në një hotel në kryeqytetin e Somalisë, Mogadishu, 32 persona u vranë dhe 63 u plagosën, tha policia somaleze. Dega e Al-Kaedës në Afrikën Lindore, al-Shabaab, mori përgjegjësinë për sulmin.

Zëdhënësi i policisë tha se një ushtar është vrarë dhe një tjetër është plagosur, ndërsa pjesa tjetër e të vdekurve janë civilë, raporton AP.

Sulmi është kryer mbrëmjen e djeshme në plazhin e njohur Lido në Mogadishu.

Një dëshmitar i incidentit tha për Associated Press se ai e pa sulmuesin të veshur me një jelek shpërthyes disa momente përpara se burri të hidhte veten në erë në hotel. Një tjetër dëshmitar i tha agjencisë se ai "pa shumë njerëz të shtrirë në tokë" dhe se ai ndihmoi të çonin disa nga të plagosurit në spital.

Zona e plazhit Lido ka qenë në të kaluarën në shënjestër të militantëve aleatë të al-Shabaab. Në sulmin e fundit të vitit të kaluar, nëntë persona vdiqën, kujton AP.

Presidenti somalez Hassan Sheikh Mohamud u shpalli "luftë totale" militantëve vitin e kaluar, ndërsa vendi filloi të merrte përgjegjësinë për sigurinë e tij.

Al-Shabaab ende kontrollon pjesë të Somalisë jugore dhe qendrore dhe vazhdon të kryejë sulme në Mogadishu dhe zona të tjera, ndërsa zhvat miliona dollarë në vit nga banorët dhe bizneset në një përpjekje për të imponuar një shtet islamik.