Një senator nga partia në pushtet në Rusi është arrestuar nën dyshimin se ka urdhëruar një vrasje, njoftoi DPA.

Këshilli i Federatës, Dhoma e Lartë e Parlamentit rus në Moskë, votoi në favor të heqjes së imunitetit të senatorit Dmitriy Saveliev, tha dje një zëdhënës i parlamentit. Ai u arrestua menjëherë pas daljes nga takimi, raportoi TASS.

Sipas prokurorisë ruse, në gusht të vitit të kaluar, politikani i lartë urdhëroi një vrasës të vriste një biznesmen. Komploti u zbulua, por për arsye taktike gjatë hetimeve u pretendua ende se krimi ishte kryer realisht.

– Vrasja është inskenuar nga organet e sigurisë për të zbuluar porositësin dhe organizatorët, tha zëdhënësi i prokurorisë.

Pretendohet se Saveliev ka paguar për vrasjen, e cila sipas gazetës “Izvestia” ka kushtuar 100.000 mijë dollarë.

Senatori është një ish-drejtues i një kompanie nafte 53-vjeçare, i cili i përket partisë Rusia e Bashkuar e Presidentit Vladimir Putin. Që nga viti 2016, ai ka përfaqësuar rajonin Tula në Këshillin e Federatës, dhe më parë ka qenë anëtar i Dumës së Shtetit, Dhoma e Ulët e Parlamentit rus.

Javët e fundit, ka pasur disa arrestime spektakolare të zyrtarëve të rangut të lartë nga elita ruse për korrupsion të dyshuar. Megjithatë, veprimi kundër një senatori i dyshuar për vrasje është i pazakontë.

Në vitet '90 të shekullit të kaluar, shumë konflikte ekonomike në Rusi u zgjidhën me vrasje me porosi, kujton DPA.