Emigracioni në Izrael nga Ukraina dhe Rusia është trefishuar që nga pushtimi rus i Ukrainës, njoftoi Byroja Qendrore e Statistikave të Izraelit.

Nga 24 shkurti, kur filloi pushtimi, deri më 31 korrik, 12.175 emigrantë mbërritën në Izrael nga Ukraina dhe 18.891 nga Rusia. Në pesë muaj, gjithsej 31.000 emigrantë mbërritën në Izrael, që është 318 për qind më shumë krahasuar me të njëjtën periudhë të vitit 2019.

Në vitin 2019, 9.774 emigrantë emigruan në Izrael, pra 2.651 nga Ukraina dhe 7.123 nga Rusia.

Nga numri i përgjithshëm i emigrantëve që mbërritën në Izrael nga Ukraina në periudhën nga shkurti deri në korrik, 74 për qind ishin gra të moshës 18 deri në 60 vjeç. Sipas Byrosë Qendrore të Statistikave të Izraelit, kjo është për shkak të ligjit të Ukrainës për rekrutim ushtarak, i cili i ndalon burrat e asaj moshe të largohen nga vendi gjatë kohës së luftës, me disa përjashtime.

Izraeli ka ofruar ndihmë financiare shtesë për emigrantët ukrainas që nga fillimi i marsit, kur Ministria e Emigracionit dhe Absorbimit u dha status të veçantë atyre që ikin nga lufta. Një emigrant që ikën nga një zonë lufte ka të drejtë për përfitime një herë prej rreth 1.800 dollarë nëse është beqar, 3.350 dollarë për një çift dhe 4.580 dollarë për një familje.

Përveç kësaj, Ministria siguron 5.800 dollarë për një person beqar dhe pothuajse 11.000 dollarë për një familje në gjashtë muajt e parë pas mbërritjes së çdo emigranti në Izrael.

Asistencë mujore për marrjen me qira të apartamenteve kanë edhe emigrantët nga Ukraina, Rusia dhe Bjellorusia.