Qeveria ushtarake e Mianmarit ka njoftuar në përvjetorin e dytë të marrjes së pushtetit se po zgjat gjendjen e jashtëzakonshme që ka qenë në fuqi që nga fillimi i vitit 2021.

Këshilli Kombëtar i Mbrojtjes dhe Sigurisë ka zgjatur edhe për gjashtë muaj gjendjen e jashtëzakonshme.

Këshilli vlerësoi se situata në vend ende nuk është normalizuar dhe se duhet kohë që vendi të përgatitet për zgjedhje të qeta dhe të qëndrueshme.

Këshilli Kombëtar i Mbrojtjes dhe Sigurisë, sipas Kushtetutës, është organi administrativ drejtues, por tashmë ai kontrollohet vetëm nga ushtria.

Data e mbajtjes së zgjedhjeve ende nuk është bërë e ditur, megjithëse kreu i Këshillit Ushtarak në pushtet, Min Aung Hlaing, i ka shpallur ato për muajin gusht, transmeton Radio Evropa e Lirë.

Në njoftimin e ri thuhet se zgjedhjet do të zhvillohen “kur të përmbushen objektivat e gjendjes së jashtëzakonshme”.

Ligji ushtarak lejon ushtrinë të marrë përsipër të gjitha funksionet shtetërore, duke i dhënë Hlaing pushtet legjislativ, gjyqësor dhe ekzekutiv.