Aktori i njohur maqedonas i teatrit, filmit dhe televizionit Mitko Apostolovski vdiq në moshën 67-vjeçare.

Lajmin për vdekjen e tij e ka bërë të ditur kolegu i tij Petar Gorko në rrjetin social Facebook.

“Pusho në paqe koleg, mik, njeri i mrekullueshëm. Ndjej një humbje të madhe. I përjetshëm qoftë kujtimi juaj”, ka shkruar Gorko.

Mitko Apostolovski u lind në Manastir më 7 mars 1955. Ka diplomuar në degën e aktorëve dramatikë në Shkollën e Lartë të Muzikës në Shkup. Gjatë karrierës së tij të aktrimit ka punuar në Teatrin Kombëtar në Manastir dhe në Teatrin Kombëtar në Kumanovë.

Ai ka luajtur role të shumta për të cilat do të mbahet mend. Ndër to është roli i Aritonit në filmin "Golemata Voda" (2004) të Ivo Trajkovit, pastaj Dimitria në filmin "Treto Poluvreme" (2012) të regjisorit Darko Mitrevski dhe Risto në "Do Balchak" të Stole Popovit të vitit 2014.