Studio "Private Print" prezanton një projekt hulumtues të grafik dizajnerit Gjorgji Despodov.
Ekspozita “Skip ad”, e cila shoqërohet me librin me të njëjtin emër të Gjorgji Despodov, nga data 26 nëntor deri më 10 dhjetor është vendosur në studion “Private Print” në Shkup.
Është një projekt hulumtues i grafik dizajnerit Gjorgji Despodov, përmes të cilit ai rimendon rolin e dizajnit grafik në drejtim të një mjeti për leximin kritik. I gjithë hulumtimi nis nga premisa se dizajni grafik sot është më së shumti në favor të prodhimit masiv, përmes të cilit formësohet bota e nevojave tona.
Prandaj, Despodov krijon një metodë artistike lozonjare të quajtur "Sesioni i Vetë-Gjetjes", një pjesë integrale e projektit më të gjerë Skip Ad. Nëpërmjet kësaj metode, e cila është e orientuar në mënyrë kritike drejt konsumizmit masiv, Despodov hap mundësinë e një aleance midis dizajnerit grafik dhe përdoruesve.
Gjorgji Despodov (1996, Prilep) është një dizajner multidisiplinar, që punon kryesisht në fushën e arteve pamore dhe krijon koncepte përmes një game të gjerë disiplinash, si dizajn grafik, vizualizime 3D dhe ilustrime.
Ekspozita dhe publikimi i Despodov janë pjesë e aktiviteteve të studios Private Print, të mbështetur nga një program i Fondit Princ Klaus në Amsterdam. Programi synon të zbulojë specifikat dhe dallimet lokale në realitetin kulturor dhe të mbështesë idetë e reja.
Në vitin 2021, studio "Private Print" ka punuar në projekte me artisten Ivana Mircevska, praktika e së cilës bazohet në video si medium, grafik dizajner Gjorgji Despodov dhe dizajner transdisiplinor Klelija Zivkovic dhe me ta zhvilloi edicionin e ri "Perspektivat e së ardhmes", në libra të cilët artistë të rinj tregojnë një qëndrim ndaj të ardhmes së artit dhe kulturës, duke rimenduar kështu pozicionin e tyre si artist apo punëtor kulturor në sistemin në të cilin punojnë.
"Private Print" është shtëpi botuese për libra artistikë dhe studio për hulumtime dhe praktika ndërdisiplinore në artin bashkëkohor dhe dizajn grafik nga Shkupi.
(Teksti u botua në “Shtypi Kulturor” nr. 107, në botimin e shtypur të gazetës “Shtypi i Lirë” më 27-28 nëntor 2021)
