Përdorimi i ilaçit Osimertinib pas operacionit ul rrezikun e vdekjes tek pacientët me kancer të mushkërive me 51 për qind.

“Tridhjetë vjet më parë nuk mund të bënim asgjë për pacientë të tillë. Tani e kemi këtë ilaç të fuqishëm”, tha Roy Herbst, zëvendësdrejtor i Qendrës së Kancerit në Yale dhe autori kryesor i studimit mbi efektet e osimertinib, raportoi Guardian.

Ai tha se shifra prej 50 për qind është një punë e madhe, veçanërisht në rastin e kancerit të mushkërive, i cili është shumë rezistent ndaj terapive.

Duke folur në Konferencën Botërore të Kancerit të Mushkërive në Çikago, Herbst tha se "rezultatet emocionuese" shtuan edhe më shumë peshë në gjetjet e mëparshme që treguan se ilaçi mund të zvogëlojë rrezikun e rikthimit të sëmundjes në gjysmë.

Ai vuri në dukje se disa pacientë në Mbretërinë e Bashkuar, SHBA dhe vende të tjera tashmë kanë akses në ilaç. Një raport nga AstraZeneca, i cili prodhon ilaçin Osimertinib, tha se ilaçi tregoi një përfitim të paparë dhe shumë domethënës për sa i përket mbijetesës së pacientit.

Ai shtoi se pas pesë vjetësh, 88 për qind e pacientëve që morën pilulën e përditshme ishin ende gjallë pas heqjes së tumorit. Kanceri i mushkërive është kanceri më vdekjeprurës, duke vrarë pothuajse dy milionë njerëz në vit.