Lista Serbe tha sot se vendimi për të mos marrë pjesë në zgjedhjet e ardhshme lokale në veri të Kosovës është “pasojë e dhunës së vazhdueshme institucionale ndaj serbëve nga regjimi i Albin Kurti”.

Në njoftim, Srpska lista rikujton se nuk janë plotësuar kërkesat që i kanë vënë si kusht për kthimin në institucionet e Kosovës, themelimin e Komunitetit të Komunave Serbe (ZSO) dhe tërheqjen e të gjitha njësive speciale nga veriu i Kosovës.

“Në dy vitet e kaluara, regjimi antiserb i Albin Kurtit kufizoi të drejtën e serbëve të Kosovës për të votuar në zgjedhje dhe referendume, ndaloi vaksinimin kundër koronavirusit dhe pengoi dërgimin e barnave dhe materialeve mjekësore, arrestoi, persekutoi dhe akuzoi serbët pa ndonjë dëshmi”, thonë nga lista serbe.

Ata akuzuan Kurtin se “përkundër marrëveshjes së Brukselit” ka penguar përdorimin e targave KM dhe në këtë mënyrë “ia ka hequr popullit serb të drejtën e lëvizjes së lirë”.

“Hordhitë ndëshkuese të forcave speciale të Kosovës ua morën tokën nikoqirëve serbë në Zubin Potok dhe Leposaviq dhe ndërtuan baza të egra në këto komuna dhe çdo ditë e ngacmojnë popullin serb dhe gjuajnë mbi serbët. I kujtojmë Albin Kurtit se që nga fillimi i vitit në Strpac nga armët zyrtare të zjarrit të pjesëtarëve të KBS-së u qëlluan mbi fëmijët serbë Stefan dhe Millosh dhe nga prapa urës së Bistricës u qëllua Miljan Deleviq”, thuhet në komunikatë.

Nga lista Srpska thonë se me “qëndrimin ndaj popullit serb, Kurti e ka treguar edhe duke i vendosur serbët e pabesë, si Nenad Rashiq për një ministër, edhe pse nuk ka përkrahje nga qytetarët dhe nga asnjë deputet në Kuvendin e Prishtinës, si dhe me refuzimin e respektimit të vendimit të Gjykatës Kushtetuese për kthimin e tokës në Manastirin e Visoki Deçanit.

“Duke marrë parasysh të gjitha sa më sipër, Lista Serbe në përputhje me qëndrimet e qytetarëve që ne i përfaqësojmë me vite të tëra, ka vendosur që të mos marrë pjesë në këto zgjedhje. Mosbesimi që serbët ndjejnë ndaj Kurtit është çimentuar nga lëvizjet e tij të fundit”, thuhet në deklaratë.

Zgjedhjet lokale në katër komuna në veri të Kosovës janë shpallur më 23 prill, ndërsa dje ka skaduar afati për regjistrimin e partive dhe kandidatëve.