Takimi Kovaçevski - Mickoski për propozimin francez
Kryeministri dhe lider i LSDM-së, Dimitar Kovaçevski sot do të takohet me kryetarin e opozitës VMRO-DPMNE, Hristijan Mickoski, në lidhje me propozimin francez për heqjen e vetos bullgare dhe hapjen e negociatave për anëtarësim të Maqedonisë së Veriut në BE.
- Në kuadër të konsultimit të gjerë që filloi menjëherë pas marrjes së propozimit evropian, kryetari i Qeverisë së Republikës së Maqedonisë së Veriut, Dimitar Kovaçevski, gjatë ditës së sotme do të zhvillojë takim me liderin e VMRO-DPMNE-së, Hristijan Mickoski. . Ky takim është pjesë e një sërë takimesh konsultative të planifikuara me liderët e opozitës, në kuadër të konsultimit të gjerë për propozimin e presidencës franceze, njoftoi Qeveria.
Në njoftim përkujtohet se kryeministri Kovaçevski pas marrjes së propozimit nga Presidenca franceze ka zhvilluar takime konsultative me liderët e koalicionit qeveritar, me trupin diplomatik, sektorin civil, me përfaqësues të opinionit ekspert dhe mediave.
Kryeministri Kovaçevski njoftoi se çdo vendim për propozimin do të merret me dialog dhe konsultim në interes të së ardhmes së të gjithë qytetarëve të Republikës së Maqedonisë së Veriut, thuhet në njoftim.
Takimi, siç konfirmojnë burime qeveritare për MPB-në, do të mbahet në ora 15:00 në Klubin e deputetëve.