Këshilli i Evropës: Na duhet një gjykatë e re e Hagës për të gjykuar liderët rusë dhe bjellorusë
Asambleja Parlamentare e Këshillit të Evropës (PACE) kërkoi dje unanimisht krijimin e një gjykate penale ndërkombëtare të posaçme në Hagë për të ndjekur penalisht liderët politikë dhe ushtarakë rusë dhe bjellorusë që "planifikuan, përgatitën, inicuan ose kryen" agresionin rus kundër Ukrainës.
“Pa vendimin e tyre për të zhvilluar këtë luftë agresive kundër Ukrainës, nuk do të kishte krime që rezultojnë prej saj, dhe nuk do të kishte shkatërrim, vdekje dhe dëmtim si rezultat i luftës, përfshirë aktet ligjore të luftës”, deklaroi asambleja.
Në seancën plenare u miratua një rezolutë bazuar në raportin e deputetit zviceran Damien Cottier.
Një gjykatë e tillë duhet të “miratohet dhe mbështetet nga sa më shumë shtete dhe organizata ndërkombëtare, veçanërisht Asambleja e Përgjithshme e Kombeve të Bashkuara”, thuhet në rezolutë.
Këshilli i Evropës duhet të marrë një rol aktiv drejtues dhe të ofrojë mbështetje konkrete, shtuan ata.
Këshilli i Evropës është një organizatë ndërkombëtare me seli në Strasburg, e themeluar pas Luftës së Dytë Botërore për të mbrojtur të drejtat e njeriut, demokracinë dhe sundimin e ligjit në Evropë. Aktualisht janë 46 shtete anëtare pasi Rusia u tërhoq nga anëtarësimi në mars të vitit të kaluar.