Fëmijët e pranuar në spitalin më të madh bullgar “Pirogov” pas aksidentit me autobusin serb janë ende në gjendje të rëndë, tha sot në një konferencë për media drejtori Valentin Dimitrov. Siç njofton korrespondenti i MIA-s nga Sofja, të lënduarit janë vendosur në terapi intensive, përfshirë edhe ata nga Stara Zagora. Nuk ka rrezik të drejtpërdrejtë për jetën e tyre, shtoi dr. Dimitrov. Një fëmijë pas një operacioni të gjatë e ka kaluar natën relativisht të qetë dje. Mëngjesin e sotëm janë grumbulluar ekipet dhe duhen edhe dy operacione për përmirësimin e gjendjes së tij. Të gjitha ekipet mjekësore dhe kirurgjikale të “Pirogov” janë në gatishmëri. Ai shtoi se kolegët e tij kanë mbështetjen e plotë të Ministrisë së Shëndetësisë së Bullgarisë.

Ambasadori i Serbisë në Bullgari, Zheljko Joviq, falënderon autoritetet bullgare për ndihmën në shpëtimin e fëmijëve pas aksidentit me bashkatdhetarët e tij në autostradën Trakia të dielën në mbrëmje, në dy intervista të veçanta për BNT dhe bTV. Joviq i cilësoi aktivitetet e ekipeve bullgare të shpëtimit dhe mjekësore si shumë profesionale. Ai bëri të ditur se pothuajse të gjithë fëmijët serbë tashmë janë në Serbi. Dy fëmijët që u operuan qëndruan në Sofje, ndërsa në Stara Zagora është një familje me nënë dhe baba me tre vajzat e tyre. “Faleminderit bullgarë, faleminderit të gjitha institucioneve, kryetarit të komunës Stara Zagora, njerëzve të thjeshtë. Në momentin e parë pamë reagimin e njerëzve të thjeshtë të kthyer nga deti, të cilët reaguan menjëherë, nuk e menduan veten. Faleminderit shumë të gjithëve që morën pjesë”, tha ambasadori serb në Sofje, Zheljko Joviq. Ai komentoi se edhe Serbia do të kryejë hetimet e saj pas përfundimit të hetimeve nga autoritetet bullgare.