Rusia dëshiron që konflikti në Ukrainë të përfundojë, por do t'i përgjigjet dërgimit të armëve perëndimore në Kiev, tha sot kreu i diplomacisë ruse, Sergej Lavrov.

Sipas Lavrov, forcat ruse do t'i përgjigjen dërgimit të armëve perëndimore me rreze të gjatë veprimi në Ukrainë duke i larguar forcat ukrainase nga kufijtë e tyre.

Në këtë mënyrë, Rusia planifikon të krijojë një "zonë të sigurt tampon".

Në një intervistë për televizionin shtetëror rus, Lavrov tha se "të gjithë do të donin që konflikti në Ukrainë të përfundonte, por mbështetja e Perëndimit për Kievin luan një rol të rëndësishëm në mënyrën se si Rusia do të pozicionohet".

Rusia nisi pushtimin e saj në Ukrainë më 24 shkurt të vitit të kaluar dhe Perëndimi u përgjigj në fillim të luftës duke dërguar armë dhe para në mënyrë që të mund të mbrohej.