Spanjollët po vuajnë: për shumicën e tyre vaji i ullirit po bëhet luks
Ministri spanjoll i Bujqësisë Luis Planas tha sot se është i shqetësuar se vaji i ullirit mund të bëhet një produkt luksi në Spanjë.
“Këto produkte janë të rëndësishme. Por për një produkt si vaji i ullirit, është e rëndësishme që ai të mbetet i aksesueshëm edhe për klasën e mesme”, tha Planas në intervistë për televizionin spanjoll “Onda Cerro”.
Thatësira e madhe dhe nxehtësia rekord ndikuan veçanërisht në prodhimin e ullirit të vitit në Spanjë. Në të njëjtën kohë, çmimet më të larta të energjisë kontribuan në rritjen e kostove të prodhimit.
Ministri Planas tha se Spanja është në rrugën e duhur për të prodhuar më pak se 800.000 ton vaj ulliri këtë vit, dukshëm më pak se në vitin 2021, kur u prodhuan 1,4 milion ton.
Ministri i Bujqësisë, edhe pse tha se nuk parashikon mungesë të vajit të ullirit, u bëri thirrje kompanive spanjolle që furnizojnë tregun vendas që të ulin çmimet e këtij produkti.
“Rritja e çmimeve ndikohet veçanërisht nga kostot e prodhimit, por përfshin edhe disa vendime ekonomike”, shtoi Planas.
Sipas raportit të inflacionit të tetorit, ushqimi në Spanjë është bërë më i shtrenjtë me 15,4 për qind krahasuar me vitin e kaluar, që është kërcimi më i madh vjetor që nga viti 1994.