Gjashtë persona kanë humbur jetën mbrëmë në një përplasje mes dy automjeteve në një autostradë në pjesën veriore të shtetit të Nju Jorkut, afër kufirit me Kanadanë, raportojnë një pjesë e mediave amerikane.

Bëhet fjalë për një minibus të kompanisë që transportonte 15 punonjës nga një kompani e energjisë diellore dhe një kamion me qira nga kompania "Penske". Dy nga personat që udhëtonin në autobus kanë mbetur të plagosur rëndë.

Përplasja ka ndodhur në kushtet e një rruge të rrëshqitshme – që nga mbrëmë në qytetin e afërt Lewisville, reshjet e borës kanë arritur një mbulesë prej 15 centimetrash. Nga fotot shihet se automjetet janë përplasur kokë më kokë, në një autostradë me rrëshqitje bore nga të dyja anët. Autostrada është mbyllur për qarkullim për 12 orë.

Ende nuk dihet shkaku i aksidentit, identiteti i viktimave nuk bëhet i ditur, Policia e Shtetit të Nju Jorkut tha se rasti është nën hetim.