Charles Michel bën thirrje që Rusisë t'i hiqet selia e përhershme në Këshillin e Sigurimit të OKB-së
Presidenti i Këshillit të Evropës, Charles Michel, tha sot në Nju Jork se Rusia duhet të pezullohet nga anëtarësimi në Këshillin e Sigurimit të OKB-së.
“Kur një shtet me statusin e anëtarit të përhershëm të Këshillit të Sigurimit fillon një luftë të paprovokuar dhe të padrejtë, një luftë që është dënuar nga Asambleja e Përgjithshme, ajo duhet të pezullohet automatikisht nga Këshilli i Sigurimit”, tha Michel.
Ai theksoi se e drejta e vetos në Këshillin e Sigurimit duhet të jetë përjashtim dhe jo rregull siç është praktikuar së fundmi dhe bëri thirrje për reforma në OKB.
Kina, Shtetet e Bashkuara, Franca, Britania e Madhe dhe Rusia kanë anëtarësim të përhershëm në Këshillin e Sigurimit të OKB-së, me të drejtën e vetos për rezolutat.
Këshilli i Sigurimit i OKB-së është organi më i fuqishëm ndërkombëtar, vendimet e të cilit janë të detyrueshme për shtetet anëtare të Organizatës Botërore. Sipas Kartës së OKB-së, Këshilli i Sigurimit mban "përgjegjësinë parësore për ruajtjen e paqes dhe sigurisë në botë".
Presidenti i Ukrainës Volodimir Zelenski në disa raste ai kërkoi që Rusisë t'i hiqet e drejta e vetos për aq kohë sa zgjat agresioni rus kundër Ukrainës.