Sot, në Belgjikë hyri në fuqi një ligj që garanton të drejtat themelore të punës së punonjësve të seksit – të kenë sigurim shëndetësor, pushim të paguar, leje lindjeje, përfitime papunësie dhe pension.

Në maj, parlamenti belg miratoi një ligj që u jep punonjësve të seksit të njëjtat të drejta pune si punonjësit e tjerë për të luftuar abuzimin dhe shfrytëzimin. Me këtë ligj, i cili ka hyrë në fuqi të dielën, sigurohet punësimi kontraktual dhe mbrojtja ligjore e personave të këtij profesioni.

Ligji synon t'i japë fund një zone gri ligjore të krijuar në vitin 2022, kur Belgjika dekriminalizoi punën seksuale, por pa siguruar të drejtat e punëtorëve si sigurimi shëndetësor ose përfitimet e papunësisë.

Sipas rregullave të reja, punonjëset e seksit kanë të drejtë të refuzojnë klientët ose akte të caktuara seksuale dhe mund ta ndërpresin aktin në çdo kohë, dhe punëdhënësit nuk mund ta ndërpresin kontratën për shkak të refuzimeve të tilla.

Punëdhënësit duhet të jenë të "karakterit të mirë" dhe të kenë një adresë biznesi të regjistruar në Belgjikë. Atyre u kërkohet gjithashtu të ofrojnë kushte të sigurta pune, duke përfshirë dhoma me butona paniku, shtrat të pastër, dushe dhe prezervativë.

Megjithatë, këto masa mbrojtëse nuk mbulojnë punën e seksit në shtëpi, as aktivitete të tilla si striptizi dhe pornografia.

Sindikata belge e punonjësve të seksit e quajti ligjin një "hap të madh përpara" për t'i dhënë fund diskriminimit ligjor në profesion. Megjithatë, ata paralajmëruan për abuzime të mundshme të ligjit.

"Ne po shohim tashmë disa bashki të fshehura pas termave si "siguri" dhe "higjienë" në mënyrë që të futin rregulla strikte lokale që e bëjnë punën seksuale pothuajse të pamundur në zonën e tyre."

Nga ana tjetër, disa organizata feministe e kritikuan ligjin. Këshilli i Grave Frankofone të Belgjikës e përshkroi ligjin si "shkatërrues" për vajzat e reja dhe viktimat e trafikimit të qenieve njerëzore.

“Të pranosh ekzistencën e prostitucionit dhe të mbrosh punëtorët do të thotë të pranosh këtë dhunë seksiste dhe të mos luftosh kundër saj”, tha presidenti i organizatës për gazetën Le Soir, transmeton Guardian.