Pothuajse një në tre shkolla në botë nuk ka akses në ujë të pijshëm të pastër dhe kanalizime bazë, sipas një deklarate të Organizatës së Kombeve të Bashkuara për Arsim, Shkencë dhe Kulturë (UNESCO). Nxënësit mësojnë më mirë në shkolla të sigurta dhe të shëndetshme, tha drejtoresha e UNESCO-s Audrey Azoulay.

Megjithatë, shumë shkollave iu mungojnë objektet e nevojshme për shëndetin e nxënësve, tha ajo. Kjo është arsyeja pse UNESCO i bën apel komunitetit ndërkombëtar që të mbështesë vendet që nuk mund të ofrojnë kushte të tilla. Sipas të dhënave, pothuajse 584 milionë fëmijë aktualisht kanë qasje të kufizuar ose aspak në ujë të pijshëm të pastër dhe kanalizime. Rreth 40 për qind e tyre jetojnë në Afrikën Sub-Sahariane.

UNESCO thekson se masat për shëndetin dhe ushqimin e nxënësve bëjnë që fëmijët të vijnë më shpesh në shkollë dhe të qëndrojnë atje. Vetëm ushqimet e rregullta shkollore kanë rritur tashmë shkallën e regjistrimit në shkolla me 9 për qind.