Lëvizja "Kush është tjetër?" në rrjetet sociale, paralajmëron protestë “marsh për përgjegjësi dhe siguri”, pas tragjedisë në disko “Pulse” në Koçan, ku humbën jetën 59 të rinj dhe rreth 200 u plagosën.

Marshi do të mbahet nën moton “Mjaft nga ne, sistemi është i radhës”, i cili do të mbahet të hënën më 24 mars dhe do të fillojë nga sheshi Maqedonia në Shkup, thonë organizatorët.

"Do të heshtim deri të dielën. Por nga e hëna, heshtja mbaron. Nga e hëna do t'ju shohim në rrugë – me zë të lartë, të pakompromis dhe të bashkuar. Që të mos ketë më harresë dhe të mos ketë më jetë të humbura për shkak të pasigurisë dhe papërgjegjshmërisë!" thuhet në thirrjen e organizatorëve në rrjetet sociale.

Nga lëvizja civile "Kush është tjetër?" Ata thonë se misioni i tyre është të luftojnë mosfunksionimin sistemik dhe se kërkojnë "qytete të sigurta, institucione të përgjegjshme dhe fundin e glorifikimit të sjelljeve devijuese".

Paraprakisht protestë në Tetovë kishte paralajmëruar edhe iniciativa “Zero”, përfaqësuesit e së cilës sot para hyrjes së Gjykatës së Tetovës lanë një fikës zjarri, siç thanë ata, për sigurinë e tyre dhe si simbol të nevojës urgjente për drejtësi të vërtetë.

Studentët paralajmërojnë protesta pas tragjedisë në Koçan