Çlirimi i Krimesë duket i pashmangshëm, Ukraina beson se do ta rifitojë gadishullin

Njësia speciale e Ukrainës në Krime / EPA-EFE/OLEG PETRASYUK
Njësia speciale e Ukrainës në Krime / EPA-EFE/OLEG PETRASYUK

Ukraina ka filluar të besojë se mund të çlirojë Krimenë, një gadishull që u aneksua nga Rusia në 2014. Kështu deklaroi Tamila Tasheva, përfaqësuesja e Volodymyr Zelensky në krye të Krimesë, pas disa ditësh diskutimi me ekipin e saj se çfarë hapash duhet të ndërmarrë Ukraina në rast se forcat ukrainase marrin kontrollin e atij gadishulli.

Duhet të theksohet se asnjë analist serioz ushtarak nuk sugjeron se Ukraina mund të jetë së shpejti në një pozicion për të çliruar gadishullin që Rusia aneksoi tetë vjet më parë, por autoritetet ukrainase, pasi çliruan qytetin me rëndësi strategjike të Limanit në rajonin e Donetskut, janë gjithnjë e më të bindur se është e mundur të çlirohet edhe Krimea.

“Ky është një moment vendimtar. Për momentin gjithçka po ndodh në atë mënyrë që çlirimi i Krimesë të duket i pashmangshëm”, tha Tasheva, duke shtuar: “Mund të mos ndodhë nesër, por mendoj se Krimenë do ta çlirojmë shumë më shpejt nga sa e mendoja një vit më parë”.

Tasheva thotë se “është shumë e rëndësishme të sigurohet që gjithçka të jetë gati në kohë, jo kur të ndodhë”.

“Kur Rusia aneksoi Krimenë në vitin 2014, ata ishin gati të vendosnin sundimin e tyre në gadishull. Dhe ne duhet të jemi gati”, shtoi ajo.

Video e ditës