Grupet punuese të Ministrisë së Transportit dhe Lidhjeve janë të gatshme të diskutojnë në nivel teknik për fillimin, përkatësisht vënien në funksion të linjës hekurudhore Manastir-Mejitlia. Jemi plotësisht të përgatitur dhe pres që edhe Republika e Greqisë të tregojë interes, tha ministri Blagoj Boçvarski.

Projekti i hekurudhës, thotë Bochvarski, është i përfunduar, ka leje përdorimi dhe është në funksion.

Sipas ministrit Boçvarski, në periudhën e ardhshme grupet punuese në nivel teknik nga Maqedonia e Veriut dhe Greqia duhet të merren vesh për detajet për vënien në funksion të plotë të linjës hekurudhore.

Nga 1 shkurti i këtij viti ka nisur transporti hekurudhor i udhëtarëve nga Manastiri për në fshatrat Kravari dhe Zhabeni, ku aktualisht po përfundon dhe është vendosur linja hekurudhore që trenat të udhëtojnë drejt Lerinit dhe Selanikut.