Publiku është në konfuzion të plotë pas incidentit të djeshëm me presidenten e Kosovës, Vjosa Osmani, pasi të gjitha palët dolën me versionin e tyre për ngjarjen. Pyesim nëse po mbulohet versioni i vërtetë i asaj që ka ndodhur dhe për cilat arsye, pyet LSDM.

– Derisa Kosova e cilësoi ngjarjen si “skandal diplomatik”, publiku nuk u nderua as me një konferencë për media nga MPB-ja për të kuptuar se çfarë ndodhi. A është e vërtetë se një person nga sigurimi i Gashit ka kërcënuar me armë zjarri punonjës të TAV-së dhe cili ishte roli i tij? Ministria e Brendshme do ta hetojë dhe ta bëjë të ditur këtë në detaje apo do të përpiqet ta fshehë rastin? Është më se e qartë se dikush po përpiqet të fshijë disa fakte nën tapet. LSDM kërkon zbardhjen e plotë të ngjarjes dhe njoftim transparent nga MPB-ja, thotë LSDM.

Sipas partisë opozitare, si në shumë situata të tjera, edhe në këtë mandat të shkurtër të Qeverisë, qytetarët nuk e dinë se çfarë po ndodh dhe cila është e vërteta.

- Ne shohim informacione kontradiktore për shumë tema çdo ditë, direkt nga përfaqësuesit më të lartë të qeverisë. Mutsunski thotë një gjë për kredinë për hekurudhën për Bullgarinë, Nikolovski një tjetër. Mickoski bërtet se do të gjejë një mënyrë për t'i ulur pagat e zyrtarëve, ministrja e financave se ajo do të largohet nëse i zvogëlohen pagat. Partitë shqiptare në pushtet kanë pretendime krejtësisht të ndryshme nga VMRO-DPMNE për të gjitha çështjet e interesit të tyre, pavarësisht nëse është MANU-ja shqiptare apo balancuesi. Kjo Qeveri është shumë e pandershme ndaj qytetarëve dhe është më se e qartë se e vërteta do të jetë e vështirë të zbulohet – thonë nga partia.