Mohamed Salah, të cilit kontrata me Liverpool-in i skadon më 30 qershor 2023, është duke negociuar një kontratë të re me “të kuqtë”, pasi dëshira e lojtarit të kombëtares egjiptiane është të jetë lojtari më i shtrenjtë në Premier League, sipas mediave britanike. .

Sipas “Football Insider”, Salah kërkon të marrë rreth 30 milionë euro në vit, që do ta kalonte dukshëm Romelu Lukakun, i cili merr 27 milionë euro te Chelsea, çka e bën atë aktualisht më të shtrenjtin në Angli.

Agjenti i tij pretendon se në kontratën e tij të re eventuale duhet të ketë kushte shumë më të mira personale për lojtarin, duke pasur parasysh paraqitjen e tij të shkëlqyer në fanellën e Liverpool-it.

Ai i referohet edhe faktit se Salah ka 15 gola dhe pesë asistime për “të kuqtë” në 12 paraqitje deri më tani që nga fillimi i sezonit.

Paraqitja e tij fantastike ndaj Manchester United në fitoren 5-0 për vizitën në Liverpool është një tjetër atu në duart e agjentëve të tij në negociatat me drejtuesit nga “Anfield”.