Ambasadori i Rusisë në Kombet e Bashkuara, Vasily Nebenzya, i tha Këshillit të Sigurimit se nëse Perëndimi lejon Ukrainën të kryejë sulme thellë në territorin rus, atëherë vendet e NATO-s "do të jenë në luftë të drejtpërdrejtë me Rusinë".

Ai theksoi para Këshillit të Sigurimit të OKB-së se “faktet janë se NATO do të jetë pjesëmarrëse e drejtpërdrejtë në veprimet ushtarake kundër një fuqie bërthamore, mendoj se nuk duhet ta harroni këtë dhe të mendoni për pasojat”.

- Nëse vendimi për heqjen e kufizimeve është vërtetuar ose do të merret, kjo do të thotë që nga ky moment vendet e NATO-s fillojnë një luftë të drejtpërdrejtë me Rusinë. Në këtë rast, natyrisht, ne do të detyrohemi të marrim vendimet e duhura me të gjitha pasojat, në mënyrë që agresorët perëndimorë të mos mund të shmangin përgjegjësinë dhe t'ia kalojnë fajin Kievit, theksoi Nebenzya.

Presidenti i Rusisë, Vladimir Putin, tha dje se nëse Perëndimi lejon Ukrainën të kryejë sulme me raketa me rreze të gjatë në territorin rus, kjo do të thotë se "vendet e NATO-s janë në luftë me Rusinë".

“Nëse merret ky vendim, kjo do të nënkuptonte përfshirjen e drejtpërdrejtë të vendeve të NATO-s në luftën në Ukrainë dhe kjo do të ndryshonte natyrën e konfliktit”, theksoi dje Putin.