Një gjykatë apeli në Rusi ka lënë në fuqi dënimin për ekstremizëm të liderit të opozitës Alexei Navalny, duke hedhur poshtë argumentet e mbrojtjes që apelonin dënimin. Kjo do të thotë se Navalny do të dërgohet në një koloni burgu me kushte edhe më të vështira, njoftuan agjencitë botërore. Sot ai humbi apelin ndaj dënimit të ri 19-vjeçar, duke e shtyrë dënimin total në më shumë se 30 vjet.

– Gjykata shqyrtoi ankesën e mbrojtjes së Alexei Navalny dhe Daniel Kholodny dhe vendosi të lërë të pandryshuar vendimin e shkallës së parë, sipas vendimit të gjykatës, të cituar nga mediat ruse. Koha që Navalny ka kaluar tashmë në paraburgim do të llogaritet si një ditë për një ditë.

Me vendimin e shkallës së dytë ai së shpejti do të transferohet në një koloni me regjim të veçantë. Tani për tani ai ndodhet në një koloni me regjim të rreptë në fshatin Melehovo, rajoni i Vladimirit.

Në gusht të këtij viti, një gjykatë në Moskë e shpalli fajtor liderin e opozitës për financim të ekstremizmit, krijimin e një komuniteti ekstremist dhe thirrje për ekstremizëm në internet.

Duke marrë parasysh vendimet e mëparshme dhe me përmbledhje të pjesshme të dënimeve, ai u dënua me 19 vjet burg në një koloni me regjim të veçantë. Ai gjithashtu u gjobit me 500 mijë rubla dhe u ndalua të përdorte internetin për 10 vjet pas lirimit të tij.

I pandehuri i dytë, Daniel Holodny, u shpall fajtor për financimin e veprimtarisë ekstremiste duke përdorur pozicionin e tij zyrtar dhe pjesëmarrjen në një komunitet ekstremist. Ai u dënua me 8 vite burg.