Rusia po diskuton një "bashkim të mundshëm të gazit" me Kazakistanin dhe Uzbekistanin në mënyrë që të rrisë furnizimin me gaz midis tre vendeve dhe t'ua ofrojë atë klientëve të tjerë, përfshirë Kinën, njoftuan sot disa media ruse, duke cituar një deklaratë të zëvendëskryeministrit rus Alexander Novak.

Novak nuk shpjegoi se çfarë do të thotë bashkimi i gazit apo në çfarë faze janë bisedimet. Zëdhënësi i presidentit të Kazakistanit Kasim-Jomart Tokaev tha sot se presidenti rus Vladimir Putin ia propozoi këtë ide Tokaevit në një takim të hënën, por as ai nuk dha detaje.

Rusia është një eksportues kryesor i gazit natyror dhe Uzbekistani dhe Kazakistani prodhojnë pothuajse aq sa konsumojnë. Të dy vendet janë të lidhura me një tubacion gazi me Rusinë, dhe një tubacion i veçantë gazi kalon nëpër të dyja në rrugën e tij për në Kinë.

Por të dy tubacionet kryesisht marrin gaz nga Turkmenistani, ndërsa Kazakistani dhe Uzbekistani nuk kanë raportuar kurrë dërgesa tranzite të gazit rus në Kinë apo ndonjë vend tjetër.