Rusia tha sot se forcat e saj po përparonin në Ukrainën lindore, ndërsa Kievi raportoi për sulme të rënda ajrore dhe i bëri thirrje Perëndimit të lejojë më shumë sulme hakmarrëse brenda territorit rus.

Moska ka shtuar sulmet ajrore javët e fundit, duke kërkuar të zmbrapsë një ofensivë të madhe ukrainase në rajonin Kursk të Rusisë.

Që nga 6 gushti, Kievi ka udhëhequr sulmet në këtë rajon, që ndodhet përballë qytetit Sumy në Ukrainën lindore, duke shpresuar të krijojë një zonë tampon atje për Ukrainën për të mbrojtur popullsinë e saj kufitare nga sulmet ajrore të Moskës. Por dy persona u vranë në një sulm të ri ajror rus në Sumy.

– Armiku ka kryer një sulm ajror në qytetin e Sumit mbrëmë. Dy persona humbën jetën dhe katër u plagosën, mes tyre dy fëmijë, njoftoi sot në Telegram administrata ushtarake e rajonit.

Kryetari i bashkisë së Sumy, Oleksei Drozdenko, raportoi shtëpi dhe makina të shkatërruara ose të dëmtuara.

Dy gra u vranë në një sulm me raketa ruse në një fshat jo shumë larg vijës së frontit në rajonin e Donetsk, epiqendra e luftimeve, tha zyra e prokurorit rajonal.

Kievi filloi ofensivën e tij në Kursk me shpresën për të detyruar Rusinë të dislokonte trupat e saj që përparojnë aktualisht në lindje të vendit. Por Moska duket se po shton sulmet e saj atje. Gushti pati fitimet më të mëdha territoriale ruse atje në pothuajse dy vjet.

Ushtria ruse njoftoi sot se ka pushtuar një qytet në Ukrainën lindore dhe po përparon drejt Pokrovsk-it me rëndësi strategjike. “Forcat ruse kanë çliruar qytetin Novokhrodivka në rajonin e Donetskut”, tha Ministria ruse e Mbrojtjes. Ky qytet i vogël ndodhet njëzet kilometra larg Pokrovsk, një qendër e rëndësishme logjistike e ushtrisë ukrainase.