Rusia dëshiron të kthehet në Këshillin e Kombeve të Bashkuara për të Drejtat e Njeriut, pasi u përjashtua prillin e kaluar për shkak të pushtimit të Ukrainës.

Moska është e listuar në faqen e internetit të Kombeve të Bashkuara si kandidate për zgjedhjen e anëtarëve të Këshillit të të Drejtave të Njeriut për mandatin 2024-2026, i cili do të mbahet më 10 tetor, raporton Index.

Anëtarësimi është bazuar në shpërndarjen gjeografike, me dy vende vakante në grupin e vendeve të Europës Lindore dhe deri më tani Rusia, Shqipëria dhe Bullgaria kanë shpallur kandidaturën e tyre për atë rajon.

Në një dokument dërguar anëtarëve të OKB-së, të raportuar nga CNN, Rusia tha se e konsideron Këshillin e të Drejtave të Njeriut një organ kyç në sistemin e Kombeve të Bashkuara.

Moska zyrtare thotë se është e rëndësishme të parandalohet tendenca në rritje e kthimit të Këshillit të të Drejtave të Njeriut në një instrument që i shërben vullnetit politik të një grupi vendesh dhe ndëshkon qeveritë jobesnike për politikat e tyre të pavarura të brendshme dhe të jashtme.

Asambleja e Përgjithshme e Kombeve të Bashkuara votoi për pezullimin e Rusisë nga Këshilli i të Drejtave të Njeriut në prill 2022.