Ukraina nuk do të përdorë armë me rreze të gjatë, të premtuara nga Shtetet e Bashkuara, për të shënjestruar territorin rus, por do t'i përdorë ato vetëm kundër njësive ruse në territorin e pushtuar ukrainas, tha sot ministri ukrainas i Mbrojtjes Alexei Reznikov.

Shtetet e Bashkuara konfirmuan të premten se raketat e reja, të cilat do të dyfishojnë rrezen e sulmit të Ukrainës, janë përfshirë në një paketë ndihme ushtarake prej 2,175 miliardë dollarësh për Kievin për t'u kundërpërgjigjur ndaj një sulmi nga forcat ruse, raportuan mediat britanike.

- Ne vazhdimisht u themi zyrtarisht partnerëve tanë se nuk do të përdorim armë të dorëzuara nga partnerë të huaj për objektiva në territorin rus. Ne sulmojmë vetëm njësitë ruse në territorin ukrainas të pushtuar përkohësisht, tha Reznikov në një konferencë për shtyp.

Kancelari gjerman Olaf Scholz, më herët gjatë ditës së sotme, tha se ka një marrëveshje me presidentin e Ukrainës Volodymyr Zelensky që armët e furnizuara nga Perëndimi do të përdoren vetëm në territorin e Ukrainës dhe nuk do të përdoren për sulme në territorin e Rusisë.

Në një intervistë për "Bild", i pyetur nëse ka një marrëveshje me Presidentin Zelensky që armët nga perëndimi do të përdoren vetëm në territorin e Ukrainës dhe nuk do të përdoren për të sulmuar territorin e Rusisë, Scholz u përgjigj se "ka një konsensus për këtë”.