Shkatërrohet banda e drogës në Gjermani dhe Belgjikë, arrestohen 17 shqiptarë
Në një aksion të përbashkët të policisë gjermane dhe asaj belge, ku morën pjesë rreth 300 policë, u shkatërrua një bandë droge që trafikonte heroinë dhe kokainë, raportojnë mediat shqiptare. Janë arrestuar 17 shqiptarë, 15 prej tyre në Belgjikë dhe dy në Gjermani.
- Hetuesit zbuluan se droga ishte kontrabanduar në kontejnerë në Belgjikë, përpara se të transportohej në Gjermani dhe më pas të shpërndahej në të gjithë Evropën. Sipas mediave, në aksion janë sekuestruar 700 mijë euro, 15 kilogramë heroinë, tre kilogramë drogë sintetike dhe tre kilogramë kokainë, 13 automjete dhe tre armë zjarri.
Europol e mbështeti këtë hetim duke ofruar ekspertizë dhe mbështetje të gjerë analitike dhe duke lehtësuar shkëmbimin e informacionit përmes kanaleve të tij të sigurta.
Një sërë takimesh operacionale u organizuan nga Europol në të gjithë Evropën për të plotësuar boshllëqet hetimore në nivel ndërkombëtar dhe për të bashkërenduar veprimet e njëkohshme që synojnë thyerjen e të gjithë strukturës së këtij grupi kriminal, shton abcnews.al.