Lëvizja e një autokolone ushtarake në jug të Serbisë, nga drejtimi i Vranjës në drejtim të Nishit, afër qytetit të Predejanit, është vëzhguar sot nga Radio Evropa e Lirë, pasi Uashingtoni dhe Brukseli shprehën shqetësimin për vendosjen e forcave serbe përgjatë kufirit me Kosova.

Predejane ndodhet 300 kilometra në jug të Beogradit dhe rreth 100 kilometra nga pikëkalimi më i afërt kufitar ndërmjet Serbisë dhe Kosovës, Merdare.

Karvani i automjeteve të Ushtrisë së Serbisë, siç raporton reporteri i Radios Evropa e Lirë, rreth mesditës ka lëvizur nga jugu në veri.

Ushtria serbe ka vendosur forcat e saj përgjatë kufirit me Kosovën pas një sulmi ndaj policisë së Kosovës më 24 shtator në fshatin Banjska të Zveçanit. Kosova akuzoi Serbinë për këtë sulm dhe Beogradi mohon çdo lidhje.

Shtetet e Bashkuara dhe BE shprehën shqetësimin për vendosjen e trupave serbe pranë kufirit me Kosovën.

Koordinatori i Komunikimeve Strategjike të Këshillit të Sigurisë Kombëtare të SHBA-së, John Kirby tha dje se Uashingtoni është i shqetësuar për "dislokimin e madh" të trupave serbe përgjatë kufirit me Kosovën.

Një ditë më vonë, shefi i diplomacisë evropiane, Josep Borrell, theksoi se BE-ja është shumë e shqetësuar për rritjen e pranisë ushtarake të Serbisë drejt kufirit dhe tha se ajo është "shqetësuese dhe duhet të ndalet".