Rusia dhe Kina nuk po krijojnë një aleancë ushtarake dhe nuk po fshehin asgjë në lidhje me bashkëpunimin e tyre ushtarak, tha sot presidenti rus Vladimir Putin në një intervistë për televizionin shtetëror.

Putin dhe presidenti kinez Xi Jinping ripohuan miqësinë e tyre dhe u zotuan të krijojnë lidhje më të ngushta në një samit në Moskë në fillim të kësaj jave, ndërsa Rusia kërkon të avancojë atë që e quan një "operacion special ushtarak" në Ukrainë.

- Ne nuk po krijojmë asnjë aleancë ushtarake me Kinën. Po, ne bashkëpunojmë në fushën e ndërveprimit ushtarako-teknik. Nuk e fshehim. Gjithçka është transparente, nuk ka asgjë sekrete, shtoi Putin.

Presidenti rus tha gjithashtu se fuqitë perëndimore po përpiqeshin të krijonin më shumë aleanca globale, duke akuzuar SHBA-në dhe NATO-n se kanë filluar të ndërtojnë një "bosht" të ri të ngjashëm me aleancën e Luftës së Dytë Botërore midis Gjermanisë, Italisë dhe Japonisë.

“Prandaj analistët perëndimorë po flasin për faktin se Perëndimi po fillon të ndërtojë një bosht të ri të ngjashëm me atë të krijuar në vitet 1930 nga regjimet fashiste të Gjermanisë dhe Italisë dhe Japonia militariste”, tha Putin.