Presidenti rus Vladimir Putin nënshkroi një dekret të enjten duke thirrur 147.000 të rinj shtetas rusë që janë të rekrutuar në shërbimin ushtarak si pjesë e rekrutimit të rregullt pranveror, njoftoi media shtetërore ruse.

“Nga 1 prilli deri më 15 korrik 2023 do të kryhet rekrutimi i shtetasve rusë nga mosha 18 deri në 27 vjeç, të cilët nuk janë në rezervë dhe që i nënshtrohen shërbimit ushtarak. Kjo vlen për 147.000 njerëz”, thuhet në dekretin e presidentit rus.

Presidenti rus nënshkroi për herë të fundit një dispozitë të tillë në shtator, duke thirrur 120.000 qytetarë në shërbim të rregullt, njoftoi agjencia shtetërore e lajmeve TASS.

Në atë kohë, Ministria Ruse e Mbrojtjes tha se rekrutimi i rregullt i vjeshtës "nuk ishte në asnjë mënyrë i lidhur me operacionin ushtarak special", termi zyrtar rus për pushtimin e Ukrainës.

Të gjithë burrat në Rusi nga mosha 18 deri në 27 vjeç duhet të shërbejnë një vit shërbimi ushtarak.