Sot pas 10 muajsh në Gjykatën Themelore të Strugës vazhdon gjykimi për të dëmtuarën Jaldz Veaposka, lindje nga Dibra, e cila gjatë një operacioni cezarian ka humbur mitrën, vezoren dhe veshkën. Të akuzuar janë gjinekologu dhe më pas drejtor i Spitalit të Strugës, Muhamed Asani, djali i tij, dr.Blerton Asani dhe doktoresha Liljana Jovanoska.

Në sallën e gjyqit pritet të prezantohet raporti nga superekspertiza, pasi mbrojtja dhe prokuroria kanë pasur ekspertiza të kundërta nëse heqja e organeve përbën krim të rëndë kundër shëndetit të njeriut apo ndërhyrje e nevojshme për t'i shpëtuar jetën Veaposkës.

Pikërisht përgatitja e superekspertizës ka qenë shkaku i pritjes 10 mujore për të zhvilluar gjykimin.

Sipas ekspertizës së tre ekspertëve të Institutit të Mjekësisë Ligjore, përkeqësimi i gjendjes së Veaposkës ka ardhur për shkak të veprimeve jo korrekte të punëtorëve shëndetësorë, ndërsa ekspertiza e këshilltarit teknik, profesor dr. Drage Dabeski, tregon se mjekët e akuzuar nuk kanë bërë gabim në trajtimin e gruas në lindje, por se veprimet e tyre i kanë shpëtuar jetën.