Presidenti i Bangladeshit shpërndau parlamentin sot, një kërkesë kryesore e protestuesve studentorë që udhëhoqën protestat që rrëzuan sundimtarin shumëvjeçar Sheikh Hasina, thuhet në një deklaratë.

"Presidenti ka shpërndarë parlamentin," tha në një deklaratë Shiplu Zaman, zëdhënës i Presidentit Mohammad Shahabuddin.

Shpërndarja e Kuvendit ishte kërkesa kryesore e koordinatorëve të protestave studentore, të cilët caktuan një afat deri në orën 15:00 me orën lokale, kujton BBC.

Studentët thanë se nuk do të pranonin një qeveri të udhëhequr nga ushtria dhe thanë se laureati i Çmimit Nobel për Paqe, Muhamed Yunus kishte pranuar të ishte këshilltari kryesor i qeverisë së përkohshme.

Koordinatori i protestave studentore në Bangladesh, Asif Mahmood përshëndeti shpërbërjen e parlamentit, duke thënë se "ultimatumi" i studentëve ishte përmbushur.

Postimi i Mahmoud në Facebook tashmë ka mbledhur më shumë se 100.000 pëlqime.

Më herët gjatë ditës së sotme, ai dhe drejtues të tjerë të protestës studentore paralajmëruan për “hapa të ashpër” nëse zyrtarët nuk plotësojnë kërkesat e tyre.

Shpërndarja e Kuvendit i hap rrugën formimit të një qeverie të përkohshme.