
Binjakët 20 ditësh të ngrirë dhe të kequshqyer kanë vdekur në Prilep
Dje nga ngrirja dhe kequshqyerja kanë ndërruar jetë binjakët 20 ditësh nga fshati Sllavej i Prilepit. Drejtori i spitalit të Prilepit, dr. Kire Jonoski, tha për “Sloboden Pechat” se njëri binjak është konstatuar i vdekur pasi është sjellë me autoambulancë, ndërsa tjetri përkundër reanimimit nuk ka mundur të shpëtohet.
Rekomanduar
-Ambulanca ka shkuar dje në vendin e ngjarjes në fshatin Slavej. Dy të porsalindurit ishin të kequshqyer, të ngrirë, unë isha prezent kur anesteziologu dhe pediatri bënë reanimacionin. Njëri fëmijë kishte shenja minimale të jetës, por reanimimi dështoi, ndërsa tjetri menjëherë u deklarua i vdekur, tha Dr Jonoski për “Sloboden Pechat”.
Ai shtoi se dy foshnjat kanë lindur në spital, jo në shtëpi.
Prindërit kanë jetuar në kushte jashtëzakonisht të vështira në fshatin Slavej, kanë pasur më shumë fëmijë dhe sipas informacioneve të pakonfirmuara do t'u hiqet e drejta prindërore ndaj fëmijëve të tjerë që kanë.
Në ora 12 është paraparë konferencë për media në Qendrën për Çështje Sociale në Prilep. Askush nuk telefonon në numrat e tyre të telefonit të lënë për kontakt në faqen e Qendrës, gjegjësisht marrin një mesazh se janë "të shkëputur përkohësisht". “Sloboden Pechat” me email i ka dërguar pyetje Qendrës nëse familja u është drejtuar më parë për ndihmë dhe nëse prindërve iu është hequr e drejta prindërore. Ne do t'i publikojmë përgjigjet nëse i marrim.
Në ndërkohë, prokurori publik ka urdhëruar kryerjen e autopsisë për të përcaktuar shkaqet e vdekjes.